ముందరి కాళ్లకు ‘బంధాలు’

 ప్రత్యర్థి చేతికి ఆయుధాలు 

 పన్నిన ఉచ్చులో విలవిల

 ప్రజల్లో తగ్గుతున్న ప్రతిష్ట

వేకువ ప్రత్యేక ప్రతినిధి: ఆరు దశాబ్దాల తెలంగాణ ప్రజల కల నెరవేర్చిన కాంగ్రెస్​ పార్టీ నూతన తెలంగాణ రాష్ట్రంలో అత్తెసరు బలంతో ఏటికి ఎదురీదుతున్నది.  రెండు పర్యాయాలు అధికారం దూరమై ఆశనిరాశల మధ్య కొట్టుమిట్టాడుతున్నది. వందేళ్ళకు పైగా చరిత్ర కలిగి,  ప్రత్యేక గుర్తింపు పొందినప్పటికీ ప్రస్తుతం రాష్ట్రంలో కంచె చేను మేసిన తీరుగా ఆ పార్టీ పరిస్థితి మారిపోయింది. ప్రత్యర్థి  పార్టీలైన టీఆర్​ఎస్​, బీజేపీ  ఎత్తుగడల్లో చిక్కుకుని విలవిలలాడుతున్నది.  ప్రధానంగా అధికార టీఆర్​ఎస్​ పార్టీ చేతిలో కొందరు కాంగ్రెస్​ పార్టీ నాయకులు ‘పావులు’గా మారుతున్నారనే విమర్శలు వెల్లువెత్తుతున్నాయి. ఈ ఆరోపణలను పక్కనపెడితే పార్టీలో అంతర్గత కుమ్ములాటలే పూర్తి శాపంగా పరిణమించాయనడంలో ఎలాంటి సందేహం లేదు.  

2014కు ముందు సమైక్య రాష్ట్రంలో అధికారంలో ఉండి తెలంగాణ ఇచ్చినప్పటికీ  నూతన రాష్ట్రంలో అధికారాన్ని దక్కించుకోలేక  టీఆర్​ఎస్​కు రాష్ట్రాన్ని అప్పగించింది.  రెండు పర్యాయాలు అధికారానికి దూరమైన ఇంకా ఆ పార్టీ తీరులో మార్పురాకపోవడంపై  తీవ్ర విమర్శలు వెల్లువెత్తుతున్నాయి.  పైగా రాష్ట్రంలో ప్రధాన ప్రతిపక్షంగా ప్రజలకు ప్రత్యామ్నాయాన్ని , భరోసాను అందించడంలో విఫలమైతున్నది. కనీసం ఆ పార్టీ నేతల మధ్య ఐక్యత సాధించలేకపోవడం శాపంగా మారుతున్నది. 

  కాంగ్రెస్​ నేతల్లో కానరాని మార్పు

ఎనిమిదేళ్ళుగా కేంద్రంలో, రాష్ట్రంలో అధికారానికి దూరమైనప్పటికీ  కాంగ్రెస్​ పార్టీ ప్రధాన నాయకుల్లో ఇంకా ‘పాత’ ఆధిపత్య, అహంకార ధోరణి  మారకపోవడంతో  ప్రజల్లో  రానురాను చులకనవుతున్నారు. జానారెడ్డి, రేవంత్​రెడ్డి, ఉత్తమ్​కుమార్​రెడ్డి, కోమటిరెడ్డి, హన్మంతరావు, జగ్గారెడ్డి, భట్టి విక్రమార్క, పొన్నాల ఎవరికి వారుగా వ్యవహరిస్తున్నారు.  గ్రూపు విభేదాలు తమ పార్టీకి అదనపు అందమంటూ....అదేదో గొప్పగా చెప్పుకతిరిగే కాలం ఇప్పుడు లేదనే విషయాన్ని ఇంకా గుర్తించకపోవడంతో అప్పుడప్పుడు ఈ నాయకుల తీరు నవ్వులపాలవుతున్నది. అంతర్గత విభేదాలను పరిష్కరించుకుని ప్రత్యర్థి టీఆర్​ఎస్​ను ఐక్యంగా ఎదుర్కోవాల్సిన పార్టీ ప్రధాన నాయకత్వంలో పొడచూపుతున్న విభేదాలు ఎజెండాగా మారుతున్నాయి. ఆ పార్టీని నమ్ముకున్న ద్వితీయ శ్రేణి నాయకులు, కేడర్​కు కంటిమీద కునుకులేకుండా చేస్తున్నారు.  రానురాను ఈ వ్యవహారాన్ని సీరియస్​గా పట్టించుకోకుంటే రానున్న రోజుల్లో ఆ పార్టీకి ఆత్మహత్యాసదృశ్యంగా మారనున్నది. 

కాంగ్రెస్​లో కాకలుతీరిన నేతలు సైతం సమయం, సందర్భం, పార్టీ లాభ, నష్టాలు బేరీజు వేసుకోకుండా తమ వ్యక్తిగత ప్రయోజనంతో అహంభావం  ప్రదర్శించడం వల్ల  కోరి ఆపదలు కొని తెచ్చుకుంటున్నారు. ఇదే అదునుగా నాయకుల తీరును అధికార టీఆర్​ఎస్​ పార్టీ నాయకులు అవహేళన చేస్తున్నారు. ఇలాంటి వరుస సంఘటనలు జరుగుతున్నా  కాసింత గుణపాఠం తీసుకోకుండా ఏకపక్షంగా వ్యవహరిస్తున్నారు. 

గులాబీ ఎత్తులకు కాంగ్రెస్​ చిత్తు 

కాంగ్రెస్​లో జరిగే పరిణామాలన్నీ పరిశీలిస్తున్న ప్రజలు, రాజకీయ పరిశీలకులు విస్తుపోతున్నారు. కోల్పోయిన అధికారాన్ని దక్కించుకుని, చేజారిన ప్రతిష్టను, పరువును నిలబెట్టుకునేందుకు, రాష్ట్రంలో ప్రజలకు అన్నింటా అండగా నిలవాల్సిన ప్రధానప్రతిపక్ష మైన కాంగ్రెస్​ పార్టీ టీఆర్​ఎస్​ అధినేత కేసీఆర్​ వేస్తున్న ఎత్తలకు చిత్తైతున్నాయి. కాంగ్రెస్​లో నేతలు తన్నుకుంటుంటే  ప్రజల్లో పలచన చేసే కార్యక్రమాన్ని టీఆర్​ఎస్, బీజేపీలు అప్రతిహతంగా కొనసాగిస్తున్నాయి. రెండు పక్షాలు కాంగ్రెస్​ను లక్ష్యంగా చేసుకుని బలహీన పరిచే ప్రయత్నాల్లో సఫలమవుతున్నారు.  వచ్చే ఎన్నికల నాటికి కాంగ్రెస్​ను నామరూపాలు లేకుండా చేయాలనే లక్ష్యంతో పనిచేస్తున్నారు.  ఒక్కోసారి కలిసిపోయి, ఇంకొన్ని సమయాల్లో వేర్వేరుగా  రెండు పక్షాల నాయకులు పనిచేస్తున్నారనేది బహిరంగ సత్యం. అయినా కాంగ్రెస్​ నాయకులు అప్రమత్తంగా వ్యవహరించకపోవడం పట్ల విమర్శలు వెల్లువెత్తుతున్నాయి. 

 జగ్గారెడ్డి పేల్చిన ‘తటస్థ’ లేఖ 

కాంగ్రెస్​లోని ప్రధాన నాయకులైన రేవంత్​రెడ్డి​, కోమటిరెడ్డి  మధ్య ఇటీవల ఐక్యతా రాగం కనబడగానే సంగారెడ్డి ఎమ్మెల్యే, పీసీసీ వర్కింగ్ ప్రెసిడెంట్‌ జగ్గారెడ్డి రూపంలో బాంబు పేలింది.  జగ్గారెడ్డి తన ఆత్మగౌరవ సమస్యను ముందుకు తెచ్చారు. కోవర్టుగా తన పై ముద్రవేస్తున్నారంటూ వ్యక్తిగత ప్రతిష్టను కాపాడుకునేందుకు కాంగ్రెస్​కు దూరమైతున్నట్లు ప్రకటించడం గమనార్హం. ఒక వైపు బుజ్జగింపుల పర్వం సాగుతుండగా లేఖ లీకైంది. ప్రస్తుతానికి తాను ఏ పార్టీలో చేరడంలేదని ప్రకటించారు.  పీసీసీ అధ్యక్షుడు రేవంత్​రెడ్డి లక్ష్యంగా తన రాజకీయ ప్రస్థానాన్ని కొనసాగించనున్నట్లు చెప్పకుండానే చెప్పారు. ఈ వ్యవహారం మరోసారి కాంగ్రెస్​లో ఏ మేరకు ప్రభావం చూపుతుందనేదానికంటే పార్టీ శ్రేణుల్లో విశ్వాసాన్ని సన్నగిల్లచేస్తుందనడంలో సందేహం లేదు. ఇదిలా ఉండగా జగ్గారెడ్డి తటస్థవైఖరిలో దాగిన మర్మమేమిటనే ప్రశ్నలు తలెత్తుతున్నాయి. ఏదోవిధంగా  ప్రజలకు కాంగ్రెస్​ ప్రత్యామ్నాయంగా కనబడకుండా చేయాలనే ప్రత్యర్ధి పార్టీల లక్ష్యం ఎప్పటికప్పుడు  నెరవేరినట్లేనని భావిస్తున్నారు. రానున్న రోజుల్లో ఇలాంటి సంఘటనలు ఏ పరిణామాలకు దోహదం చేస్తుందోననే చర్చ మరోసారి ప్రారంభమైంది.